N ta parabeniza FORCV pa 2 razon: i) pa divulgason di es mensajen di promoson di sidadania; ii) pa uzu di nos lingua maternu nes apelu, opson intelijenti pa txiga korason di Kabuverdianus sugundu opinion di Nelson Mandela ("If you talk to a man in a language he understands, that goes to his head. If you talk to him in his language, that goes to his heart." - konferi: http://www.brainyquote.com/quotes/quotes/n/nelsonmand121685.html).

N ta fikaba mas sabi si Redason di FORCV respeita lei kabuverdianu (Dekretu-Lei nº 8/2009, di 16 di Marsu di 2009) ki ofisializa definitivamenti alfabetu kabuverdianu. Efetivamenti, nes momentu, alfabetu kabuverdianu ten mesmu statutu legal ki alfabetu purtuges o ingles. Pur konseginti, sima Redason di jornal ka ta skrebe ingles o purtuges sima da-l na kabesa, mas sin, di akordu ku lei; tanbe Redason di jornal debe skrebe lingua kabuverdianu di akordu ku lei. E un forma di respeita leitor i valoriza nos maior patrimoniu imaterial - lingua kabuverdianu.

Asin, nha sujeston e pa apelu en apresu fika: ORA DI RESENSIA DJA TORNA TXIGA / SI BU KA RESENSIA INDA / O BU NOMI KA PARSE NA KADERNU ELEITORAL / KA BU SPERA / BA RESENSIA!

Sertu di nhos atenson, N ta kaba es komentariu ku agradesimentus antesipadu.