|
N sta ben revive nha infansia
Lenbra di tudu kuza sabi
Di brinkadera ki fika na nha mimoria
Di kel “tenpu ki ka ta ben mas.”
Nu pilingrin ta korre na txuba
Dibaxu di xuveru natural-djaroz
Ta korre roda di arku barril
Mi ku nha amigu Kaitaninhu
Ku alegria d’un bon anu di azagua.
Papa ku mama ta tira simentera di sinza
Pa bai nterra na txon modjadu sima lama
Pa da kumida i mata fomi
Pa kaba ku kalamidadi.
Nha irmon ta fazi funda pa tadja korbu
Nos tudu ta digudja bangolon
Mama ta konta kel storia sabi
Di nha fada fadona i nha fada fadinha
Na sonbra di luz di kafuka.
Ai, forti tenpu sabi!
Oji e dia di mata porku
Mininus ta spera bixiga pa fazi bola
Boka moladu ta spera toresma
Ku sonu na odju xeiu di meladu.
Dia di Tulusantu e festa riju:
Mindju berdi asadu na braza
Fijon berdi na kaleron
Kulam na buli
Kórea na tagarra pa fazi mantega.
Na padjigal, mininus ta legra balansia
Ai ku ses boka van di bokera,
Di tantu lapi balansia na pedra Filipa Nuna.
Kel molon riskadu ta fazi konviti di distansia
Grandi ku miodu ta fareja sima katxor
Ta sigi kel txeru di purfumi natural
Na txon forti di kobon di kaza.
Dia janeru e pa bai toma madrinha benson
Mininus pa tudu strada i kutelu
Ku pratu ku keki kubertu ku tuadjinha
Ku speransa di trazi ropa pa bai granpona
Ma si ka atxa nada, e txoru finkadu…
Mi Armanda Kaela ka falta-m nha prizenti
Benson sabi xeiu ranju
Madrinha di oru ki Nhordes da-m
Ki fika oji na lugar di nha mai
Pa Nha Virjen-Maria abensua-l tudu se vida!
Es e tenpu sabi di mininu di fora
Ta rikorda ku sodadi se epuka di kriansa
Undi so dizoredjadu ka ta lenbra
Tenpu sabi di se infansia.
|
Comments
Parabens i ka nhu faltu-nu ku es opurtunidadi.
I mi, particularmenti N ta agradese, pamodi txeu vakabuláriu N ka konxeba, enbóra N trabadja alguns tenpu na Fogu, i N sa ta purbeta-s pa pa un Disionáriu ki dja N sta ku sinku anu N ta purpara i dja N tene 400 i tal pájina A4 skrebedu.
Parabens i ka nhu faltu-nu ku es opurtunidadi.
I mi, particularmenti N ta agradese, pamodi txeu vakabuláriu N ka konxeba, enbóra N trabadja alguns tenpu na Fogu, i, N sa ta purbeta-s pa pa un Disionáriu ki dja N sta ku sinku anu N ta purpara i dja N tene 400 i tal pájina A4 skrebedu.
Armanda Kaela e mudjer di Ermonji (Hermogenes de Barros)ki era responsavel di tudu obra na Fogu. Realmenti, Armanda e nha madrinha di ORU ki Nhordes da-m.
Xatiado, ke-li falta-m pa N poi n'es puema...Foi txeu kuzas di tenpu mininu. Dja tinha txeu tenpu ki N ka obiba palavra "bikansu." Obrigadu i txeu saudi pa bo i bu familia.
Sin sinhor! Nos lingua ta pirmiti-nu konta kuzas sima nu sunha-s, sima nu odja-s, sima nu vive-s, ka tra ka po! So el ta permiti-nu ser fiel a nos pensamentu.
Sabendu ma maioria smagador di nos konpatriotas ta uza es mesmu kodigu pa arkiva vida, leitor ta reproduzi imajen fiel di vida di autor.
Ti kel pontu ki infansia di leitor ta koinsidi ku di pueta, ti la leitor ta identifika ku es pueta ki ta transfigura na se porta-vos dotadu di don di konbersu sabi pa nobilita se infansia pintadu na forsa di kada palavra.
Viva pueta Aníbal da Silva! Viva nos lingua sabi doxi!
RSS feed for comments to this post